الدين و الأخلاق مش إيد واحدة

مبدئياً لازم أعترف إن من حوالى سنة او اكتر شوية كنت فاكر إن الدين هو الأخلاق و الأخلاق هى الدين. و لكن حصل و عرفت بالصدفة إن واحد من أعز اصدقائى ملحد و دى كانت اول مرة اعرف حد ملحد اصلاً و بإختصار شديد قلتله “يابنى لو مفيش دين الدنيا هتبقى بايظة كل واحد يسرق ولا يقتل و مفيش حاجة تمنعه مش هيبقى حرام”…

طبعاً انا دلوقتى ببص على اللى كنت بقوله و أضحك على التخلف اللى كنت فيه … اه الإعتراف بالحق فضيلة و انا فعلاً كنت متخلف لما قلت إن الواحد منغير دين مش هيبقى عنده أخلاق و إليكم التفاصيل بإختصار برضو.

أولاً عندك كام ألف متدين بيقتل و بيسرق إلخ… كل سنة؟؟ مش هننسى قضية التحرش الجنسى لقساوسة ألمانيا ولا طالب الأزهر اللى أغتصب بنت أخته اللى عندها 9 سنين. و بالتالى مش معنى إن الواحد متدين إنه معصوم من الخطأ مثلاً ولا كمان هيقلل من خطأه.

الموضوع ببساطة زى مسلم و مسيحى و بوذى و ابيض و اسود و يهودى و العنصرية كلها إلخ … ممكن تلاقى واحد مسلم احسن من واحد مسيحى و ممكن تلاقى بوذى احسن منهم كلهم.. الأخلاق الواحد بيتولد بيها و مالهاش علاقة بالدين.. اللى أخلاقه كويسة محترم و اللى أخلاقه فاسدة مش محترم.

أنا فاكر اول مرة اكذب فحياتى كنت حاجة كدة بتاع 3 او 4 سنين و قلت لوالدتى انى اخدت الدوا و انا مخدتوش عشان مكنتش بحبه و من نفسى وشى إحمر و اعدت اضحك عشان انا عارف إنى بعمل حاجة غلط – ملحوظة: انا لحد دلوقتى أفشل واحد يكدب فالعالم – المهم إن الإنسان عارف الصح من الغلط بالفطرة منغير الحرام و الحلال و الجنة و النار و بالتالى ممكن تلاقى الملحد اللى يبقى صاحبك اكتر من اى متدين ممكن يطلع مش محترم.

كل التدوينة دى عشان خاطر الناس المتخلفة اللى مع محاكمة مايكل نبيل بسبب أفكاره اللى ضد قطاع عريض من المصريين. الولد معملش حاجة تضر حد و كلامه مش بيحرض على الكراهية ولا القتل و بالتالى كلامه مش بيضر عشان احنا نضره. معاً ضد محاكمة المدنيين أمام محاكم عسكرية.

Advertisements

About justanegyptian

Just An Egyptian
This entry was posted in أى كلام, إجتماعيات, دين, عربى and tagged , , . Bookmark the permalink.

12 Responses to الدين و الأخلاق مش إيد واحدة

  1. Rasha says:

    اولا:انامن الناس الي مبتعجبهمش افكار مايكل نبيل ابدا لاني بشوف ان اغلب كلامه عنصري بشكل رهيب,لكن انا ضد محاكمة المدنيين بالشكل ده,يعني اختلافي معاه فالرأي ميخلنيش أييد ظلمه اومحاكمته بشكل عنصري,,
    ثانيا:بالنسبة للاخلاق والدين:هو اكيد طبعا معاك حق الاخلاق والدين مختلفين عن بعض ,,بس هما فعلا ايد واحدة بتلجم الانسان عن فعل الاعمال المنافية للاخلاق,او التي تؤذي الاخرين,, بس تاكيدا لكلامك هل كل من يتدينون بديانة معينة اخلاقهم فضلي:لا ,,طب هل كل من لا يتدينون بديانةلايعلمون شيئا عن الاخلاق: برده لا,,,, بس الديانات بتحث الانسان علي فعل الفضيلة وتضع له حدود اكثر لتمنعه من ارتكاب الاخطاء,, وعلي مر التاريخ هنجد امثلة لاحصر لها للرسل والانبياء الذين ساهموا في اصلاح المجتمعات وتهذيب النفوس البشرية….
    وياريت لما يكون عندك وقت تقرا كتاب”حوارمع صديقي الملحد” للدكتور مصطفي محمود ,, لانه كيف ان نحترم الاخر وكيف يكون لنا الحق في الدفاع عن معتقداتنا دون اذية مشاعر اياكان.
    And finally a great work, go on 🙂

  2. Gow says:

    استاذ مينا
    احب اثنى اولا على استعدادك لتقبل الاخر وتغيير رأيك للى مقتنع بيه
    بس الفكرة ان الامثلة دى مش مقياس
    اولا لانها مش كتير
    ثانيا لأن مش دول المتدينيين اصلا …. متدين بجد يعنى يمشى ورا القران والسنة او تعاليم المسيح او وت سو ايفر فى كل امور حياته 😀
    القران وتعاليم المسيح لو مشينا وراهم هنبقا عندنا احسن اخلاق… ومينفعش تكون مولود بأخلاق …. طبعا الأخلاق مكتسبة … طبعا طبعا .. والا مالوش لازمة الحساب و محدش يلومنى لو عملت حاجة غلط لأنى اتولدت بيها
    فكر فى الموضوع كدة تانى
    واكيد كلنا ضد محاكمة مدنيين محاكمة عسكرية

    • كلامك مظبوط بس الدين مش هو الأخلاق … الأخلاق بتيجى من التربية مش من الدين … كلنا بنتربى على الدين و بيطلع مننا لصوص و بلطجية و إلى آخره و ممكن تلاقى واحد غير متدين و لكن أخلاقه احسن من مليون قسيس او شيخ

      الدين ليس معيار للأخلاق

      • Asmaa Khairy says:

        بالظبط انا اتفق مع مينا في النقطة دي
        الدين مش معيار للاخلاق و التربية هيا اللي ليها الدور الاساسي سواء التربية في البيت أو التربية في المجتمع ككل

        و ع العموم أنا مش ضد أفكار مايكل و يؤسفني اني اقول انه كتير من الناس ممكن يرفضوها لانهم مش مستوعبين كنها اصلا .. لكن انا احترم افكاره و اتفق مع بعضها

        و حتى و لو كان مايكل بيفكر تفكير مش بس غلط لأ منحرف فاي واحد سوي كان ممكن يبقى مكانه و اللي هتقبله على مايكل لازم تقبله على نفسك وعلى غيرك لانك معرض تكون مكانه في اي لحظة

        احييك يا مينا

  3. ايه الكلام الفاضي ده كلام غبي بصراحة ! ممكن تقولي كيف متدين يسرق!ليش السرقة مش حرام؟ كيف متدين يقتل أو يتحرش ؟ ليه ماتقول شكله متدين أو فكرته متدين ؟

    ثم بأقول لك حاجة أتمنى تقدر تفهمها:
    مافيش حد أسمه متدين في الإسلام
    فيه مسلم والتدين شيء نسبي الله أعلم به
    ممكن واحد أمين وبيشرب خمر عنده مشكلة في حاجة ولكنه أمين
    وممكن واحد ملتحي بس حرامي عنده مشكلة انه حرامي بس هوه ملتحي يعني ليش اسمي الأول مش متدين والثاني متدين
    أو ملتحي بيغتاب وبيكذب وشخص شكله مش متدين زي ماتقول ولكن لسانه نضيف ومحترم

    الدين المعاملة هذا حديث شريف
    ولما تقول الدين والأخلاق مش ايد وحدة ده كلام خطييييير مفترض تتوب منه أنت وكل اللي شاركك في الرأي
    وبتنتقد إنتقد الشخص على غلطه مش الدين – الدين كامل
    والناس مافيهم كمال وكل واحد له عيوب وعنده أخطاء وعليه معاصي ومفيش حد معصووووم يعني متدين ديه جايبينهم من عند غيرنا مش تبعنا
    إن أكرمكم عند الله أتقاكم
    والتقوى محلها القلب ما أحد يتدخل في القلوب الا ربها
    وفي الحديث إن الله لاينظر إلى صوركم وأشكالكم ولكن ينظر الى قولبكم

    • يا أستاذى واضح إنك فاهم الموضوع غلط و انت بترد على نفسك
      النقطة هنا هى إن التدين ليس معيار للأخلاق و مش ممكن نقيس أخلاق واحد بدرجة تدينه
      ممكن الملحد يقون اخلاقه احسن من شيخ

  4. لا حرام كده اكتب لك تستفيد أنت واللي شاركوك الرأي تقوم حاذفه !!!

  5. مينا مراد says:

    حضرتك جايب أمثال على ناس مش متدينين فقط تدين شكلى وبتاخدهم كمثال دينى دول مش المسيح او الانجيل مثلا
    *
    فى جزئية أخرى اتفق معاك ان الطفل يقابل التربية قبل الدين بس التربية عند حد معين بينتهى دورها ويظهر دور الدين اللى بيوقف عن الانغماس فى العالم الملىء بالاشياء الخاطئة واعتباره الملاذ
    واديك مثال
    من اين الحروب و الخصومات بينكم اليست من هنا من لذاتكم المحاربة في اعضائكم
    تشتهون و لستم تمتلكون تقتلون و تحسدون و لستم تقدرون ان تنالوا تخاصمون و تحاربون و لستم تمتلكون لانكم لا تطلبون

    انا كنت زيك فى الأول بس مش ضد الملحدين بس كنت بشعر بالأسف حيالهم بس مايكل بعض كلامه بيجرح أيمان الواحد وان كان ده نتيجة كبت وهجوم عليه كملحد فطبيعى انه بيرد وحزنت جدا لما حدث له كأنه انا وأكثر
    وشكرا مشاركتك لنا بافكارك وتواضعك المعهود

  6. محب فايز says:

    طيب أنا متفق معاك ومش متفق برضوا

    1- أولاً منقدرش نحكم على حد أصلاُ مية في المية إذا كانت اخلاقة كويسة ولا لأ
    (blind side) يعني في جزء في الإنسان اسمه المنطقة العمياء او
    ف ممكن يبقى واحد كويس معاك اوي بس في بيته اخلاقه وحشة مثلاً او ممكن مثلاً يكون بيشوف افلام بورنوجراف
    فممكن نعتبره اخلاقه وحشة

    او ممكن تكون مش دي وجهة نظرك للأخلاق او تكون ببتكلم عن الأخلاق السلوكية
    وبرضوا في ناس بتتكيف مع نوع الناس اللي معاها يعني مع اصحاب معينين تبى تمام ومع ناس تانية تبقى مش تمام اوي

    2- انا شايف إن وظيفة الدين مش إنها تتطلعك عندك أخلاق … لكن الدين بيحدد هوية أخلاقك وبيحدد كمان نظرتك للأخلاق

    انا كمسيحي اقدر اقول إني مثلاً اقدر افهم اوي عن المحبة من يسوع ف أقدر احب اللي حواليا من تعاليم المسيح بشكل مختلف .. ف ده يبان عليا وعلى سلوكي الأخلاقي

    في واحد تاني مثلاً شايف ان فلان الفلاني ده إنسان رزل وانا بكرهه .. وشايف إن ده مش عيب في أخلاقه
    بس ممكن تكون من وجهة نظر مسيحية الكره ده سوء خلق

    انا رأيي إن التربية أصلاُ نابعة من جزور دينية من الأب والأم … سواء هما متدينين أو الأصل بتاعهم نابع من اصول دينية

    ف الخلاصة إن الدين هو محفذ للأخلاق ومدعم وكمان مقياس إذا كانت الأخلاق دي فعلاً كويسة .. ولا مقايسك بتتغير

    يعني اصل الغلط والصح جه من وجود أديان من الأصل مع الضمير طبعاً .. بس الضمير بيتشكل بالدين

  7. طبعاً انا ضد حبس مايكل نبيل تماماًُ

    وكنت عند المحكمة وقت القضية

    ومازلت ضد كدة وضد كل اللي بيحزوق في القضية
    وكنت بستاتفهه اللي كان بيقول
    جه الزمن اللي ادافع عن واحد بيدعم إسرائيل
    وكاننا بندافع عن أفكار الناس مش عن ادمية الناس

    ما احنا طول عمرنا بنتظاهر في كفاية علشان يطلعوا المعتقلين الإخوان

    مع إن لو على المباديء من وجهنظري معندهمش مباديء أصلاً

    بس مش هقعد أتنطط واقول شايفين انا بدافع عن دول .. انا بنسى الأفكار وبدافع عن الإنسان

  8. ramy says:

    عايز اقولك حاجة : مش اي واحد بقي في وضع ديني(قس او حارس كنيسة و كدة ) بقي متدين
    و مفيش متدين معصوم من الخطا
    شوف داوود عمل اية زمان ؟
    زني و قتل و عمل كل حاجة غلط و بعدين تاب
    الانجيل بيقولك “الصديق يسقط و يقوم في اليوم سبع مرات”
    مفيش حد مبيغلطش طالما عايش علي ارض حتي البابا و القسيس و رهبان لكن التوبة هي الاهم
    الفكرة في ان في ناس بتاخد الدين مظهر و دي المشكلة الكبري و دا حوار تاني خالص

  9. ramy says:

    احب اضيف ان في بني ادم ياباني كذاب و بني ادم ياباني غيرة بردة متربي معاة في نفس البيت و صادق
    في مباديء عامة بتتزرع جوا الطفل من و هو صغير “الضمير و دا من قبل اختراع الديانات حتي و هو الكان بيفرق بين صح و غلط

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s