الوطن العربى و جامعة الدول

بمناسبة مرور 15 سنة على أوبريت الحلم العربى اللى كان حاجة من الحاجات القليلة جداً إللى إجتمع عليها مطربين الدول العربية من المحيط للخليج … ليه معندناش حاجة إسمها وطن عربى؟

هل ياترى الإتحاد الأوروبى اللى فيه 23 لغة رسمية غير أكتر من 7 لغات غير رسمية أحسن مننا؟ بلاش ياعم الإتحاد الأوروبى … بلد زى بلجيكا اللى مهماش راسيين يتكلموا فرنساوى ولا داتش أحسن مننا؟ الولايات المتحدة اللى فيها 50 ولاية كل واحدة فيهم ليها القوانين بتاعتها و اهى دولة واحدة فالآخر… إيه الكلام؟

فالحين إحنا نعمل جامعة الدول العربية و نعمل إجتماعات و نروح و نيجى !! طب مابلاها مصاريف يا عم الحج طالما مفيش أمل من الإختراع السخيف اللى من ساعة ماوعيت على الدنيا و إنتوا مصورينه على إنه إعجاز القرن و فالواقع هو أفشل مشروع فتاريخ البشرية!!

من و أنا صغير و مفيش عالأخبار غير إجتماع مصغر و إجتماع مكبر و إجتماع قمة و بتنجان مشوى … إيه؟ بنتكلم لغة واحدة و الأديان فالمنطقة يتعدوا عالصوابع و مايجوش واحد على مية من عدد الأديان فأمريكا …… الحمد لله اللهم لا حسد كل الدول العربية فى مؤخرة الدول فى قوائم الإنفاق على البحث العلمى و مش فالحين نسأل فحاجة غير ممكن أقول لجارى كل سنة و إنت طيب ولا حرام!! ….. مين المسئول عن الكارثة دى؟ أمى؟

يعنى تبقى شايف قدامك فالخمستاشر سنة دول بس – من ساعة الأوبريت ماتعمل- سودان إتفككت و عراق إتنيلت و جزاير إتجننت و واقف تتفرج ببلاهة و لا مبالاه غريبة …. و تزعل قوى و تتحرق على حق فلسطين !!! بصراحة و بدون مبالغة ياخى أحة

متقسمين كل كام ألف فاكرين إنهم ملوك العالم و كل واحد همه الأول الأخير فرض ديكتاتوريته على غيره و العالم يطلع لقدام و إحنا نتفرج و نشتكى!! و بلاش الوطن العربى يا عم … مسألتش نفسك اللى بيحصل فبلدك دة سببه ايه؟

إليكم جزء من تدوينة لخالد ابو النجا:


فيه حد تعمد يختار المحافظين عسكريين من شرطة و جيش فى الغالب برغم ان ثورتنا مدنية و الباقى هم فلول الحزب الوطنى زى محافظ اسكندرية ذو 80 عام عشان ثورة الشباب

نفس الحد ده هو اللى ترك الأمور تشتعل فى قنا عشان يتحول الأمر لفوضى و فتنه

هو نفسه برضة اللى سايب مبارك يتمارض و يقعد فى شرم مع ان هذا غير قانونى

هو برضة نفس اللى ادى مبارك و العصابة شهرين يخفوا الأدلة و يهربوا الفلوس و يستفوا اوراقهم و بالتالى نتكبد نحن المزيد من العناء و نواجهه بضياع الأموال

و هو اللى فرض علينا قانون احزاب تعجيزى و مكلف للشباب عشان يظهر على الساحة التيار الدينى فقط

و هو اللى عمل مش سامع لما قلنا لازم كل مديرين الأمن يتغيروا بدل ما ينتقموا منا بنشر الفوضى

و هو نفسة اللى مش بيعرف يعذب غير بنات فى المتحف و يحاكم فنانى الثورة الشباب لكن مش عارف يقبض على بلطجية المستشفيات و المدارس عشان يعترفوا على اللى باعتهم و لا قادر على ارهاب السلفيين للنساء

و هو اللى خلانا نصرف 200 مليون جنية فى الوضع الاقتصادى الصعب ده على التصويت على تعديل ست مواد و بعدها فرض علينا 63 مادة

على فكرة الحد ده بتجيله حالة عصبية اول ما حد يقول قدامة مجلس رئاسى مدنى

طول ماحنا ماشيين خلف الراجعية المتخلفة اللى إتربينا عليها… على سبيل المثال و ليس الحصر: “المسلم يكره المسيحى و العكس” … “كلنا نكره اليهود” … “الكوايتة بيكرهوا المصريين” … إلخ…. لستة طويلة مالهاش آخر طول ما إحنا ماشيين وراها إبقى تعالى تف عليا لو عرفنا نعمل دولة عشان نبقى نعمل وطن عربى و يبقى لينا وضع محترم فالعالم بدل حمى الإستيراد اللى خلت كل من هب و دب يتحكم فينا.

مشوا كل الناس اللى ماسكة البلاد دى على إنها ورث أهاليهم !!! معنديش مشكلة أجيب الوطن العربى كله على الأرض طالما متأكد إن عندنا القدرة نبنيه على نضيف و يبقى أحسن منطقة فالعالم…. يمكن دة مجرد حلم بس كل شىء جايز و اللى خلانى أشوف مبارك مخلوع يخلينى أشوف وطن عربى أحسن من الإتحاد الأوروبى

 إتفرج و عيط ياخويا منك ليه يمكن تحس على دمك و تشوف حاجة تفيد بيها بلدك بدل الفرجة على التلفزيون و الكلام الخيبان اللى  جايبنا ورا

Advertisements

About justanegyptian

Just An Egyptian
This entry was posted in نقد, أى كلام, سياسة, عربى and tagged , , , , . Bookmark the permalink.

3 Responses to الوطن العربى و جامعة الدول

  1. Rasha says:

    طب يعني ايه؟؟ماهو احنا بدأنا أهو الحمدلله من غير جامعة عربية ولابتاع…. والي بيحصل في مصر دلوقتي مش بس ثورة مضاده دي نفوسنا احنا الي لسه عايزالها ثورة عشان تتغير…..
    I like this post, but the question is what next and how can we get 2gethr!! who knows!

  2. OmarKen says:

    كل الأمثله اللى انت قولت عليها … عندهم حاله انا مش عارف اصنفها كويس
    بس إحنا كعرب عندنا حاله انا عارف اسمها كويس جدا وهيا ( التعريص الجماعى)ومعندناش استعداد تنتازل عن الوضع الحالى لأنه بيييييس قوى فى قاموس التعريص الفردى اللذي يؤدى الى حاله ممتازة فى التعريص الجماعى
    والله الموفق
    والمستعان 🙂

  3. mary mikhail says:

    بص يامينا المقال فعلا شدنى والمقال مافيش حاجة فيه جديدة لان الناس كلها عارفين الكلام ده
    هاقولك الغريب فى المقال هو الاسلوب الجرئ بالعامية وعلشان كدة بيدخل القلب على طول انا منيش كاتبة ولا فقيهة فى اللغة بس لهتم بالفواصل يامعلم اصلى تهت كذة مرة وانا بقرأ
    وعن رأيى بقى فى الموضوع ف أحييك عليه ماهى برده حاجة تجنن ان احنا اصلا بثروات الاراضى العربية احنا ماسكين العالم كله.
    وعلشان كدة اهتمام كل بلد بنصيب الاسد ف اتفقنا الا نتفق وكله يدور على مصلحته
    هو كان فيه خطة جمال دى لو كنا التزمنا بيها كان بقى الحال غير الحال وأول ما توفى حصل لغبطة فى مفهوم الناس سواء وفضلت الحواجز تتبنى لحد ما عملو الفرق الرهيب ده بين طبقات المجتمع ثم الطوائف.
    وطبعا انا بحلم زيك مش بس بوطن عربى آمن لكن كملن عالم اقل دموية من اللى احنا فيه ده وتلاقى النقص فى مصر مثلا فى القمح يتزرع فى ليبيا ولا تونس تعمل مصانع تظبط لنا قصة القطن اللى بنصدر ونستوردو فى لبس دى….يعنى كمثال طبعا كلامى مالوش خلفية مدروسة ولكنه حلم اننافعلا نبقى بنى آدميين ولو اتفقنا بس على الحق والعدل كل حاجة هاتتحل بعد كده معلش انا كتبت كتير وخرجت عن الموضوع اهى الجلالة خدتنى شوية اصلى دمى محروق برده انى مش فاهمة حاجة منين بعد ثورتنا بنطلب حرية عدالة اجتماعية وكل اللى بيحصل اننا بنشيل واحد من هنا نحطه هنا وعلى ارض الواقع مافيش تغيير مافيش تطوير مافيش كلنا ايد واحدة وبقى كل طائفة مشغولة ازاى تسيطر ماهى حاجة تجنن ولو بتسأل مين اللى ورا الكلام دة ف أنا رأييى احنا وعلى رأى ابراهيم عيسى احنا محتجين الاول نحرر عقولنا واحنا حررنا نظامنا قبل عقولنا والناس غلبانة ومش فاهمة حاجة ف طبيعى معنهاش ثقة فى حد والبلد بقت ماشية كمؤامرة مين على مين انت مش فاهم بس فى ثقة غريبة ياأخى ان بكرة هيكون احسن بس ازاى؟؟؟؟؟؟؟؟ادينا بنفكر مع بعض

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s