الأخبار و إعتصام 8 يوليو

صحيت أول إمبارح و كالعادة بشوف الأخبار و كانت الأخبار كالآتى … سوزان مبارك بتشتكى حراس قصر شرم الشيخ عشان موقفوش لجناب حرم المخلوع و هى داخلة القصر!! و تم تغيير الحرس … ثم خبر تأجيل محاكمة المتهمين بقتل الثوار و رجوعهم لوظايفهم حتى 3 سبتمبر … مبقتش عارف أعمل إيه!!! عايز أولع فالبلد يمكن الناس تحس على دمها و تعرف إننا عملنا ثورة و 1000 شهيد و آلاف المصابين دفعوا التمن .. ألف عيلة حزينة على اللى مات و مش عارفين يعملوا إيه

بعديها خبر عن الشهيد خالد سعيد بيقول إن لفافة البانجو إتحطط فى فمه بعد وفاته … فمع ملاحظة مرور سنة على إستشهاده عرفنا   المعلومة دى دلوقتى !!! يعنى محتاجين ثورة لكل شخص تم تلفيق قضية ليه عشان نعرف الحقيقة و يا قلبى لا تحزن

ثم جاء اليوم خبر عن النائب العام إنه طعن على الحكم ببرائة المغربى و الفقى و غالى و فضلى …. بقيت مش عارف أتكلم خالص عشان مش فاهم هم إزاى أخدوا برائة و هل إنه طعن يبقى دة حاجة كويسة ولا دة إيه دة؟؟ يعنى هو إزاى أصلاً ياخدوا برائة من الأول؟؟ لو دول معملوش حاجة يبقى مين اللى عمل؟ أمى؟

كله كوم طبعاً و والدة الشهيد اللى إبنها التانى اللى باقلها إتحاكم عسكرى بعد القبض عليه عند مسرح البالون!! يعنى واحد مات و التانى مسجون … و اللى قتل الأول و اللى حبس التانى ظلم موجودين بكامل سلطاتهم و وظايفهم … ذنب الست دى إيه إن الولدين اللى عندها يروحوا منها كدة؟؟؟

عشان كل دة انا شايف إن 8 يوليو هو الأمل … من الواضح إن 28 يناير و 2 فبراير مكانوش الثورة دول كانوا مجرد هزار و أخدنا على قفانا و سكتنا و بعد كل الأخبار دى انا مش شايف أى رجا من القضاء ولا النيابة ولا الداخلية ولا أى حد … لما يحصل فصل بين السلطات بجد و يبقى فى دولة مدنية بجد ساعتها ممكن الواحد يقتنع إننا عملنا ثورة … لكن انا مش حاسس بأى تغيير و الأمل هو 8 يوليو

Advertisements

About justanegyptian

Just An Egyptian
This entry was posted in نقد, سياسة, عربى and tagged , , , , , , , , , , . Bookmark the permalink.

3 Responses to الأخبار و إعتصام 8 يوليو

  1. Pingback: Egypt: Why July 8? | Sao-Paulo news

  2. Pingback: Egipt: Dlaczego ósmy lipca? · Global Voices po polsku

  3. Pingback: O Egito pós-Mubarak ainda ferve | Blog do Disimo – Textos para pensar

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s