جو الشحاتة و البلطجة بتاع اليومين دول

بعد مبادرة محمد حسان عشان نلم تبرعات تغنينا عن المعونة الأمريكية اللى الناس هيصتلها بدون ادنى معرفة عن المعونة الأمريكية -سواء حجمها أو بتتصرف على مين- إنتشر جو من الشحاتة غريب و لازمله وقفة بجد .. عشان نعرف الإقتصاد اللى بنشحت عليه دة آخرته إيه

مبدئياً شركات المحمول التلاتة هيحصلوا 51 قرش من كل مشترك لمدة عشر شهور و 50 قرش لمدة شهرين ليكون إجمالى إختراع “ضريبة الدمغة” 6 جنيه و عشر قروش تروح لخزينة الدولة من عملاء الكارت فقط  .. دة غير إختراع إن كل موظف يتبرع بيوم من الأجر الشامل لكل شهر “لدعم الإقتصاد المصرى” .. عشان عندنا مشكلة إقتصادية بنت كلب يعنى

مبدئياً بيفرضوا ضريبة منغير موافقة مجلس الشعب على اى اساس؟ محدش يقولى أصل عقد التليفون بينص على فرض رسوم بدون إخطار عشان دى فلوس رايحة للدولة .. هى بلطجة يعنى؟

ثانياً ليه عملاء الكارت بس اللى يدفعوا الضريبة هما ولاد البطة السودة يعنى ولا إيه؟

ثالثاً إشمعنا 6 جنيه و عشر قروش سنوياً؟ لو 6 جنيه بس الإقتصاد هيتخرب مثلاً؟

و بعد الأسئلة اللى مالهاش معنى دى بأة أحب اسأل فحاجة تانية خالص .. هو حيث إن الإقتصاد خربان ممكن مجلس الشعب أو مجلس العسكر أو أى مجلس يجاوبنى على الأسئلة دى؟

طالما الإقتصاد واقع بتصرفوا فلوس ليه على بناء أطول خازوق فالعالم عشان ندخل بيه موسوعة جينيس؟ إتبسطوا لما دخل؟

طالما معناش فلوس بننقل المخلوع فطيارة ليه طالما ممكن ننقله بعربية إسعاف؟؟ هو دة لو مسجون عادى كان هيتنقل فطيارة عشان حالته الصحية؟ كان هيتعالج اساساً؟

طالما بنشحت من طوب الأرض جايبين عربيات بى إم دبليو للشرطة على أى اساس؟؟ بتزودوا مرتباتهم ليه و مفيش فلوس؟؟ مش عارفين تخلوهم يشتغلوا زى بقيت الناس الشقيانة فشغلها كل يوم؟؟

طالما عجلة الإنتاج واقفة إزاى سايببين وزارة الداخلية تستعين بشركات خاصة “لضبط الأمن” فى ظل ما إن عدد أفراد العاملين بأجهزة الأمن فى مصر يتعدى عدد الشرطة فالإتحاد الأوروبى كله؟ هى مصاريف و خلاص؟

لو فعلاً فى أزمة صرفتوا أكتر من مليار على إنتخابات الشورى اللى مكانش ليها اى لازمة و عدد اللى صوتوا فيها كان أقل من عدد المترشحين و عملتوا إستفتاء مالوش اى لازمة برضو غير إحداث فوضى حيث إن فى كل الأحوال كان هينزل علينا “الإعلان الدستورى” اللى بيتناقض مع المواد المستفتى عليها اصلاً

فالحين بس تهدروا مليارات و بعدين تشحتوها من الشعب اللى مش لاقى ياكل .. لأ بجد الإقتصاد صعبان عليا و عايز أتبرع!!! إيه حرقة الدم و البلطجة دى؟ فعلاً البلد مليانة بلطجية و آدى اللى خدناه من الثورة!

Advertisements

About justanegyptian

Just An Egyptian
This entry was posted in نقد, إقتصاد, سياسة, عربى and tagged , , , , , , , , , , , , . Bookmark the permalink.

3 Responses to جو الشحاتة و البلطجة بتاع اليومين دول

  1. omar mostafa says:

    كنت محتاج تتكلم عن الاقتصاد من الاسصاس مين الى يملكه هل الشعب ولا حفنه من رجال الاعمال وعن القوانين الراسمالية والاقتصاد الحر الى مهما كسب اساسا مش هيوصل للمواطن منه شىء والنفع بيعود على الدولة والمستثمر ورجل الاعمال
    تانى حاجه كنت محتاج تتكلم عن المسئولين الى اساساى مرتباتهم مليون واتنين مليون وتلاته مليون وان احنا المفروض نعيد هيكلة الاجور
    تلاته كنا محتاج تتكلم عن عدم الاستقرار السياسى الى بيؤدى بالتبعيه لعدم استقرار اقتصادى
    والغياب المتعمد للامن

  2. AHMED GAMAL says:

    يا مينا يا جاااااااااااااااااااامد مقال في الجون يا صديقي

  3. كمان ليه ما يتعملش حد اقصي للاجور وليه مرتبات ظباط الجيش تتضاعف بعد الثورة وليه فيه موظف حكومي ياخد اكتر من 100الف وكل ده ليه اذا كانت المساعدات الامريكية لم يتم منعها اصلا وكمان المساعدات دي امريكا لازم تدفعها طالما محافظين علي المعاهدة اللي مافيش حد ناوي يلغيها وحتي لو هتلغي يبقي الحكومة ملزمة تشوف بدائل بعيدا عن مرتبات الموظفين اللي محتاجة تتحسن مش تتخصم منها

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s