شوية أحلام عن القضاء على التلوث

رجعت اقلب فالقديم و أتفرج على كتاباتى من و انا عندى 13 سنة و لما شفت التدوينة اللى كتبتها يوم 24 يناير أولاً مصدقتش إن انا اللى كاتب الكلام دة و مش عارف كتبته إزاى .. بس المهم إنى إفتكرت أحلامى “التافهة” و حيث إنى دايماً بتجنب اكتب فالموضوعات اللى الناس كلها بتكتب عنها فقررت إنى اكتب عن احلامى دى يمكن ييجى اليوم و تتحقق زى حلم خلع مبارك كدة

فى السنة التانية فالجامعة إنضميت لمنظمة طلابية بتعمل مشاريع لخدمة المجتمع و من ضمن المشروعات دى كان فى مشروعين للقضاء على التلوث و دى من أكتر القضايا اللى بتجننى فالبلد

المشروع الأول كان إسمه بايوديزل و كان عبارة عن إعادة تدوير الزيت المستخدم فالمطاعم لإستخدامه كوقود بديل عن الديزل بدون الحاجة لعمل أى تعديلات على الموتور و بعد التجارب فالمعمل عملنا اول تجربة بس للأسف مكانش عندنا التمويل الكافى لتكملة التجارب.

المشروع التانى كان فالصعيد و مجموعة راحت علمت الفلاحين إزاى يستخدموا قش الرز فى عمل علف للحيوانات و المشروع نجح و العلف كان مفيد لدرجة إن نص الفلاحين المشاركين فالمشروع قالوا إن البقر انتج حليب اكتر و المشروع كبر و علموا الفلاحين إنهم يبيعوا الفائض من العلف و إزاى يحسبوا التكلفة و المكسب و كيفية الإدخار و مبادىء المحاسبة. و كانت الجامعة الأمريكية عاملة مشروع زى دة و كان مشروعهم إنهم علموا الناس تزرع “عش الغراب” – ماشرومز- فى قش الرز بدل ميحرقوه

فآخر السنة انا كنت واحد من اللى بيمثلوا الجامعة فالمسابقة اللى على مستوى الجمهورية  و كان بيتنافس فيها 18 جامعة و كانت اول سنة لينا فالجامعة الالمانية و فزنا بالمركز الرابع.

مرة تانية كان جدى بيكلمنى عن إختراع كدة بيتعمل فى فنلندا مش فاكر إسمه .. المهم إنه كان شىء بيحرق قش الرز بطريقة غير مضرة بالبيئة و بيولد كهرباء و ساعتها انا عملت بحث و كلمت “نهضة المحروسة” و حاولت إنى الاقى حد يدعم المشروع بس إستسلمت بسرعة بصراحة

أخيراً كانت فكرة جت فدماغى السنة اللى فاتت لما كنت رايح الجامعة الساعة 7 الصبح و الجو جميل و فجأة على الطريق الدائرى لقيت عربية بطلع عادم خلانى إتعميت … قلت لنفسى “هو ليه الحكومة متعملش قانون تدفع اللى زى دة مبلغ و قدره عشان كدة حرام” قبل مخلص الجملة كان اتوبيس نقل عام معدى و العادم بتاعه جاب أجلى … ضحكت على العبط اللى انا فيه و قلت “و اهو الحكومة تدفع الحكومة غرامة” .. و من هنا جاتلى الفكرة

انا كل اللى فكرت فيه إن فى شركات بتصرف ملايين على الدعاية كل سنة و منها شركات الإتصالات .. هيحصل إيه لو إشترت الشركات دى اتوبيسات زى بتاعة أوروبا .. محترمة و تساع ناس اكتر و مش بتضر البيئة و تحط عليها دعاية مجاناً بتمن الاوتوبيسات دى و اهو يبقى كل الناس كسبانة.. البلد شكلها يبقى أنضف و الناس مرتاحة اكتر و نقلل العوادم و نعرف ناخد مخالفة لو عربية ملاكى بتطلع عادم

على قد مالتلوث مشكلة ممكن تكون تافهة لكن لاحظ إن التلوث بيأثر على الفرد و قدرته على الإنتاج ثم الأمراض الناتجة عنه و تكلفة الرعاية الصحية  غير الزراعة و المحاصيل و الحيوانات و إلى آخره … يعنى التلوث مش مجرد شوية دخان فالهوا و عندنا مشاكل أهم .. التلوث مشكلة زى أى مشكلة بتأثر على كل حاجة فحياتنا و نفسى اشوف اليوم اللى مشروع من دول يتعمل بجد بأة!

The organisation I mentioned above is called SIFE – Students In Free Enterprise-